Vegna þess hve fá próf eru í vor ákvað stjórn FHD að sækja um undanþágu til að halda heiðapróf næstkomandi laugardag 25. mars. Próf þetta var á upprunanlegri prófadagskrá deildarinnar, en var fellt niður að beiðni stjórnar HRFÍ. Nú hins vegar hefur heildarprófadagskrá tegundahóps 7 breyst og kominn grundvöllur fyrir því aftur. Prófið er haldið í samvinnu við Írsk Setterdeild.
Þannig að Ellaprófið verður haldið laugardaginn 25. mars í nágrenni Reykjavíkur. Dómari prófsins og fulltrúi HRFÍ er Svafar Ragnarsson og prófstjóri Einar Örn Rafnsson, einungis verður prófað í opnum flokki.
Besti hundur í opnum flokki hlýtur til varðveislu í eitt ár Ellastyttuna "Náttúrubarnið" sem gefin var af vinum Erlends heitins Jónssonar fuglahundadómara sem lést fyrir aldur fram.
Opnað verður fyrir skráningu í prófið um leið og skrifstofa HRFÍ opnar á morgun, mánudaginn 20. mars og verður hægt að skrá til loka miðvikudags. Prófið ber númerið 501701 og þarf að taka það fram við skráningu. Okkur er ljóst að skammur fyrirvari er á þessu prófi en við vonum að sem flestir sem eiga hunda í prófformi taki þátt.
Einar Örn prófstjóri prófsins (s: 864 2294) gefur allar frekari upplýsingar um prófið.