Nú um helgina var haldin síðari hluti meginlandshundaprófs þar sem dæmt var eftir reglum SKF . Um sögulegan viðburð er að ræða þar sem þátttakendum í fyrsta meginlandshundaprófi á Íslandi gafst kostur á að ljúka síðari hlutanum, sem meðal annars felur í sér sækivinnu í vatni og spor. Þátttakendur í meginlandshundaprófinu voru fjórtán, en eftir sátu þrír hundar með einkunn í heiðavinnu og tókst þeim öllum að klára sækihlutann nú um helgina með einkunn.

Er þetta í fyrsta sinn á Íslandi sem haldið er ræktunarpróf þar sem meginlandshundar eru dæmdir miðað við ræktunarmarkmið og eiginleika hverrar tegundar fyrir sig. Með þessu prófi er verið að auka fjölbreytileika og koma til móts við félagsmenn sem eiga meginlandshunda með það í huga að fá fleiri þátttakendur í félagsstarfið. Almenn ánægja var með viðburðinn og ljóst að meginlandshundapróf geta aukið umsvif og starfsemi með fuglahunda undir merkjum HRFÍ. Dæmt var eftir sænkum reglum SKF.